Беларуская споведзь Naka: выйшаў альбом «Мая малітва»

NAKA print 01Гурт Naka выпусціў свой першы цалкам беларускамоўны альбом «Мая малітва». Праца над плыткай заняла амаль год, цягам якога каманда значна змяніла свой склад.  Стварэнне самага беларускага альбома ў гісторыі гурта пачалося пад час судовых прэтэнзій да спадчыны Янкі Купалы – песні «Малітва» — і завершылася толькі ў снежні. Кліп на загалоўную песню ўжо добра знаёмы слухачам, цяпер ідзе праца над ролікам на песню “Трывай.”

«З усіх выпрабаванняў мы выйшлі годна, сталі больш дарослымі па светаадчуванні, як пасля сапраўднай споведзі, больш узнёслыя і глыбокія, — кажа лідарка Naka Наста Шпакоўская. — Гэты альбом не супраціў ці даніна модзе на беларускасць. Ён пра любоў, душу і шчырасць. І гэта наш адказ на спробы «прыватызаваць» тое, што належыць усім, як, напрыклад, малітву».

У беларускамоўным альбоме калектыў па-новаму асэнсаваў верш Янкі Купалы «Мая малітва» і выканаў песню «Ты пакліч мяне» на верш паэткі Яўгеніі Янішчыц. Слухач знойдзе новыя версіі песень «Муза» на верш Алеся Плоткі, і «Чакаем» у электронным гучанні. “Не адпускай” выкананая ўдвох са Стасам Мытнікам (Акute), а «Пра любоў» гучыць на трох мовах адразу — беларускай украінскай і рускай.

Гурт Naka творыць ужо 11 год. За гэты час каманда выпусціла 4 альбомы: “Тебе”, “Пора”, “Довольна”, “Naka-piano», каля 20-ці відэакліпаў, дала канцэрты ў Беларусі, Расіі, Украіне і Літве, прыняла ўдзел у буйных фестывалях, сярод якіх «Крылья», “Окна открой”, “Навальніца”, «Нашествие». Лідэр гурта Наста Шпакоўская ў 2010 годзе атрымала тытул “Рок-княжна” цырымоніі ўзнагароджання лепшых рок-музыкаў Беларусі “Рок-каранацыя”.

Канцэртная прэзентацыя альбому адбудзецца 8 сакавіка ў клубе RE: PUBLIC.

Добавить комментарий